Noida – ८०० कोटींचा ट्विन टॉवर अवघ्या १२ सेकंदात जमीनदोस्त केला

नवी दिल्ली : नोएडा सेक्टर ९३-ए येथील ट्विट टॉवर जमीनदोस्त करण्यात आले आहेत. दुपारी अडीच वाजता दोन्ही टॉवर पाडण्यात आले. स्फोटकांच्या मदतीनं अवघ्या १२ सेकंदांत ट्विन टॉवर उद्ध्वस्त करण्यात आले. ट्विन टॉवरचं बांधकाम करताना नियमांचं उल्लंघन झालं. अधिकारी आणि बिल्डरच्या संगनमतानं हा प्रकार घडला. सर्वोच्च न्यायालयानं ट्विट टॉवर जमीनदोस्त करण्याचा आदेश दिला. त्या आदेशाची अंमलबजावणी आज करण्यात आली.

सुपरटेक कंपनीनं ट्विन टॉवरची उभारणी केली होती. बांधकाम करताना नियमांचं उल्लंघन करण्यात आलं. दुपारी अडीच वाजता ट्विन टॉवर पाडण्यात आले. त्यांचं सध्याचं बाजारमूल्य ७०० ते ८०० कोटी रुपये इतकं होतं. टॉवर पाडण्यासाठी जवळपास १७.५५ कोटी रुपये इतका खर्च आला. हा खर्चदेखील सुपरटेकला करावा लागला.

दोन्ही टॉवरमध्ये एकूण ९५० फ्लॅट्स होते. सुपरटेकनं २०० ते ३०० कोटी रुपये खर्चून ट्विन टॉवरची उभारणी केली होती. ज्या ठिकाणी ट्विन टॉवरचं बांधकाम झालं, त्या भागात मालमत्तेचा दर सध्या १० हजार रुपये प्रति वर्ग फूट इतका आहे. हा आकडा विचारात घेतल्यास ट्विन टॉवर्सचं मूल्य १००० कोटी रुपयांच्या पुढे जातं. मात्र कायद्याच्या कचाट्यात सापडल्यानं दोन्ही टॉवरच्या मूल्यावर परिणाम झाला आणि ते ७०० ते ८०० कोटींपर्यंत आलं.

ट्विन टॉवरमध्ये ७११ ग्राहकांनी फ्लॅट बुक केले होते. यापैकी ६५२ ग्राहकांसोबत सुपरटेकनं सेटलमेंट केली. बुकिंगवेळी दिलेली रक्कम आणि व्याज असा पर्याय देण्यात आला होता. बाजारमूल्य किंवा बुकिंगवेळचा दर अधिक व्याज मिळून त्या इतक्यात दराचा दुसरा फ्लॅट असाही पर्याय दिला गेला.

काहीजणांनी ट्विन टॉवरमधील फ्लॅटच्या बदल्यात स्वस्तातली प्रॉपर्टी घेतली. अशा फ्लॅट मालकांना अद्याप उर्वरित रक्कम मिळालेली नाही. ट्विन टॉवर्सच्या ५९ ग्राहकांना अद्यापही मोबदला मिळालेला नाही. मोबदला देण्याची मुदत ३१ मार्च २०२२ होती.