चिंताजनक पुणे जिल्ह्यात म्युकरमायकोसिसचे १७६ रुग्ण वाढले

पुणे – शहर आणि जिल्ह्यात या आठवड्यात काळ्या बुरशीचा संसर्ग झालेल्या म्युकरमायकोसिस’च्या रुग्णांमध्ये १७६ रुग्णांची वाढ झाली आहे. त्यामुळे एकूण ९६८ रुग्णांवर सध्या उपचार सुरू असून, आतापर्यंत ९० जणांचा मृत्यू झाला आहे.

‘म्युकरमायकोसिस’च्या रुग्णांवर सध्या शहरातील सरकारी आणि काही खासगी मेडिकल कॉलेजशी संलग्नित रुग्णालयात उपचार सुरू आहेत. जिल्ह्यात एप्रिल महिन्यात ३५५, मे महिन्यात ४२१ आणि जून महिन्यात आतापर्यंत १९२ रुग्ण आढळले आहेत. मे महिन्यात सर्वाधिक रुग्ण आढळले आहेत.

पुणे शहरात २६ मे रोजी ‘म्युकरमायकोसिस’चे २९० रुग्ण होते. त्यात दोन ते नऊ जून दरम्यान ७१ रुग्णांची वाढ झाल्याने पुण्यात आतापर्यंत ४०६ रुग्णांची नोंद करण्यात आली. त्यापैकी ९७ रुग्ण उपचानंतर बरे झाले असून, अद्याप २८० रुग्णांवर उपचार सुरू आहेत; तर २९ रुग्णांचा मृत्यू झाला आहे. पुणे जिल्ह्यात दोन ते नऊ जून या दरम्यान १७६ रुग्णांची नोंद करण्यात आली. त्यात पिंपरीमधील ३१, ससून रुग्णालयात ६० आणि पुणे ग्रामीण भागांत १४ रुग्णांचा समावेश आहे.
पिंपरी-चिंचवडमध्ये एकूण २२७ रुग्णांची नोंद झाली असून, त्यापैकी ११० रुग्णांवर उपचार सुरू आहेत. त्याचप्रमाणे ९३ रुग्ण बरे झाले असून, २४ रुग्णांचा मृत्यू झाला आहे. पुणे जिल्ह्याच्या ग्रामीण भागांत आतापर्यंत ४५ रुग्ण आढळले असून, त्यापैकी १५ रुग्ण बरे झाले आहेत. सध्या २१ रुग्णांवर उपचार सुरू असून नऊ रुग्णांचा मृत्यू झाला आहे. ससून रुग्णालयात २९० रुग्ण आढळले असून, त्यापैकी २२५ रुग्णांवर उपचार सुरू आहेत, तर ३७ रुग्ण बरे झाले आहेत. २८ जणांचा मृत्यू झाला आहे. आतापर्यंत जिल्ह्यात ९६८ रुग्णांना ‘म्युकरमायकोसिस’ झाला असून, २४२ रुग्ण
उपचारानंतर बरे झाले आहेत. सध्या ६३६ रुग्ण उपचार घेत असून आतापर्यंत ९० रुग्णांचा मृत्यू झाल्याची माहिती जिल्हा आरोग्य विभागाने दिली आहे.