जडाबाई दुगड शिक्षण संकुल येथे संगणक कक्ष आणि ग्रंथालय चे उद्घाटन

पुणे :  सुखसागर परिसरात गोरगरीब विद्यार्थ्यांच्या शैक्षणिक उन्नतीसाठी उभारण्यात आलेल्या जडाबाई दुगड शिक्षण संकुल येथे संगणक कक्ष आणि ग्रंथालय चे उद्घाटन मोठ्या उत्साहात पार पडले. लेडीज सर्कल इंडिया यांच्या राष्ट्रीय अध्यक्षा श्रीमती शीशम सबरवाल आणि क्षेत्र अध्यक्षा श्रीमती मेघा राठी यांच्या हस्ते या अत्याधुनिक लॅबचे उद्घाटन करण्यात आले.

या प्रसंगी गौरव दुगड, मोनल दुगड , शाळेच्या मुख्याध्यापिका नंदा राजाराम भोसले, पुणे कॉस्मोपोलिटन राऊंड टेबल 110 चे अध्यक्ष अश्विन संघवी, पुणे कॉस्मोपोलिटन लेडीज सर्कल 81 च्या अध्यक्षा सुमन पोरवाल, सचिव वीनीता खाटर, कोषाध्यक्ष विनिता ओसवाल यांच्यासह अनेक मान्यवर उपस्थित होते.

कार्यक्रमात बोलताना संस्थेच्या सचिव मोनल दुगड यांनी सांगितले की, “सुमारे 40 वर्षांपूर्वी गोरगरीब मुलांसाठी सुरू केलेली ही शाळा आज मोठ्या प्रमाणात विकसित झाली आहे. येथे सेमी-इंग्लिश माध्यम सुरू करण्यात आले असून कमी शुल्कात दर्जेदार शिक्षण देण्याचा आमचा प्रयत्न आहे. विद्यार्थ्यांच्या सर्वांगीण विकासासाठी आता लायब्ररी आणि संगणक लॅबची भर घालण्यात आली आहे.”

ही संस्था कै माणिकचंद नारायणदास दुगड यांनी सुरू केली असून सध्या प्रमोद माणिकचंद दुगड हे चेअरमन म्हणून कार्यरत आहेत. तर गौरव दुगड उपाध्यक्ष आणि मोनल दुगड सचिव पदावर कार्यरत आहेत.संस्थेच्या माध्यमातून सुखसागर परिसरात विविध सामाजिक उपक्रम राबवले जात आहेत.

या प्रसंगी शीशम सभरवाल यांनी या संयुक्त प्रयत्नांचे कौतुक केले आणि मानवी जीवनात परिवर्तन घडवून आणण्यासाठी शिक्षणाचे महत्त्व अधोरेखित केले. तंत्रज्ञान आणि पुस्तकांची उपलब्धता कशा प्रकारे संधींमधील तफावत भरून काढू शकते आणि विद्यार्थ्यांसाठी एक उज्ज्वल भविष्य घडवू शकते, यावर त्यांनी प्रकाश टाकला. नव्याने उभारण्यात आलेला संगणक कक्ष मुलांना आवश्यक डिजिटल कौशल्ये विकसित करण्यास मदत करेल, तर ग्रंथालय संस्थेतील विद्यार्थ्यांमध्ये वाचनाची सवय आणि आजीवन शिकण्याची वृत्ती जोपासण्यास हातभार लावेल अशी अपेक्षा आहे.

या उपक्रमासाठी पुणे कॉस्मोपोलिटन राऊंड टेबल 110 आणि पुणे कॉस्मोपोलिटन लेडीज सर्कल 81 यांचे विशेष सहकार्य लाभले. तसेच मोहित गलानी, भावना गलानी, पूर्वा संघवी, प्रीती कटारिया आदी मान्यवरांचीही उपस्थिती होती.